कपिलवस्तु, १८ साउन ।
पब्लिक क्याम्पस संघ कपिलवस्तुले जिल्लाका सामुदायिक विद्यालयहरुमा गरेको शूल्क वृद्धि फिर्ताको माग गर्दै विद्यार्थी संगठनहरुले सामुहिक ज्ञापनपत्र बुझाएका छन् । बुधबार संघका जिल्ला अध्यक्ष डा. विनय पाण्डेयलाई भेटेरै जिल्लाका क्रियाशिल ६ विद्यार्थी संगठनहरुले सामुहिक ज्ञापनपत्र बुझाएका हुन् ।
विद्यार्थी संगठनहरुले बुझाएको ज्ञापनपत्रमा तत्काल ४ दिने अल्टिमेटम छ । आगामी ४ दिन भित्र माग सुनुवाई नभए संघर्षका कार्यक्रम घोषणा गर्ने विद्यार्थी नेताहरुले बताएका छन् । उनीहरुका अनुसार ४ दिन पछि शूल्क वृद्धि फिर्ता नलिए क्याम्पसहरुमा विरोधसभा आयोजना गर्ने, हातमा कालोपट्टी बाधेर विरोध गर्ने, क्याम्पस प्रमुखलाई क्याम्पस आउन निषेध गर्ने, अनसन बस्ने लगायत रहेका छन् ।
संघले हालै मात्र ९ सय ७५ मासिक शूल्कलाई बढाएर १५ सय पुर्याएको छ । भर्ना र अन्य शूल्कमा समेत भारी शूल्क वृद्धि भएको छ । शूल्क वृद्धिको विद्यार्थी संगठनहरुले चौतर्फी विरोध गरिरहेका छन् । विद्यार्थी संगठनहरुले बुझाएको ज्ञापनपत्र बुझ्दै संघका अध्यक्ष पाण्डेयले ज्ञापनपत्रलाई अध्ययन गरि कार्यान्वयन गर्न तर्फ पहल गर्ने प्रतिवद्धता जनाएको अनेरास्ववियू कपिलवस्तुका अध्यक्ष दिपक अनुरागीले जानकारी दिए ।
ज्ञापनपत्र बुझाउनेमा एमाले निकट अनेरास्ववियू, कांग्रेस निकट नेविसंघ, माओवादी केन्द्र निकट अनेरास्ववियू (क्रान्तिकारी), एकीकृत समाजवादी निकट अनेरास्ववियू, विप्लव निकट अखिल (क्रान्तिकारी) र राष्ट्रिय जनमोर्चा निकट अखिल (छैठौं) रहेका छन् ।
प्रतिक्रिया