सडक खाली गराएर सवारी हुने परम्परा तोड्दै राष्ट्रपति पौडेलद्वारा कुमारी घरको दर्शन

काठमाडौं, ४ चैत्र । राष्ट्रपति रामचन्द्र पौडेल कारगेट नलिई काठमाडौंको बसन्तपुरस्थित कुमारी घरमा पुगेका छन्। राष्ट्रपति पौडेलले शनिबार अपरान्ह पहिलोपटक कुमारी घरमा दर्शन गर्न जाने क्रममा सडक खाली गराएर मात्रै सवारी हुने परम्परा तोडेका हुन्।कारगेटविना नै उनले त्यहाँ पुगेर कुमारीको दर्शन गरे। त्यसक्रममा सर्वसाधारणको सवारीलाई सुरक्षाकर्मीहरुले रोक्ने काम गरेका थिएनन् । राष्ट्रपतिको कारगेटसहितको सुरक्षाका कारण सडकमा सर्वसाधारणले सास्ती व्यहोर्नु परिरहेका बेला नवनिर्वाचित राष्ट्रपति पौडेलले कारगेट विना नै सवार भए।राष्ट्रपतिमा निर्वाचित भएपछि पशुपतिनाथको दर्शन गर्न जाँदा सडक जाम भई उनको आलोचना गरिएको थियो। उनी गत फागुन २५ गते राष्ट्रपतिमा निर्वाचित भएका थिए।