काठमाडौं, २४ चैत्र । नेकपा माओवादी केन्द्रका उपमहासचिव जनार्दन शर्माले आफू पार्टी सुदृढीकरणमा लाग्ने बताएका छन्। शुक्रबार सुर्खेतमा पत्रकार सम्मेलनमा बोल्दै उपमहासचिव शर्माले पार्टी निर्माणमा लाग्ने भएकाले योपटक मन्त्री नहुने बताए।
‘मैले निर्वाचनका बेला नै यो कार्यकालमा आफू मन्त्री नहुने घोषणा गरिसकेको छु। त्यसकारण कार्यकर्तालाई भ्रम नहोस्– म मन्त्री हुँदिन, पार्टी निर्माणमा लाग्छु। बजारका हल्लाको पछि लाग्नु हुँदैन,’ उनले भने।
उनले माओवादीको पुनर्गठनबारे सोच्नुपर्ने बेला आएको बताए। देश माओवादीकै एजेन्डामा चलिरहे पनि पार्टी कमजोर भइरहेको विषयलाई गम्भीरता पूर्वक लिनुपर्ने बताउँदै शर्मा सबैभन्दा पहिला माओवादीभित्रको बेरोजगारी अन्त्य गर्नुपर्ने बताए।
‘पहिले माओवादी भित्रको बेरोजगारीलाई अन्त्य गरेर मात्रै हाम्रो समग्र देशको बेरोजगारीको अन्त्य गर्न सक्छौँ,’ उनले भने, ‘पार्टीभित्रको बेरोजगारी अन्त्य गर्नका लागि सबै नेता, कार्यकर्ता उत्पादनमा जोडिनुपर्ने हुन्छ । यो बाहेक माओवादीसँग अर्को विकल्प छैन ।’
शर्माले माओवादी कुनै सेल कमिटी नरहेकाले अब उत्पादनको सेल कमिटी हुनुपर्ने बताए । उनले थपे,‘कुनै पालिका कमिटी होइन माओवादी, पालिकाको उत्पादन कमिटी हुनुपर्छ भन्ने बुझाइलाई आत्मसात् गर्नुपर्ने छ ।’ वर्तमान अवस्थामा माओवादी र जनताबीच बेमेल रहेको माओवादीको निष्कर्ष छ।
प्रतिक्रिया