कृषि औजार र सिप पाए पछि एकल कृषक महिला खुशी

कपिलवस्तु २६ चैत्र।

एकल कृषक महिलालाहरुको ३ दिने बेमौसमी तालिम सकिएको छ । मानवअधिकारका लागि एकल महिला समुह कपिवस्तुको आयोजना र वाणगंगा नगरपालिकाको सहयोगमा भएको तालिम आइतवार सकिएको हो । तालिमको समापन गर्दै वाणगंगा नगरपालिकाका प्रमुख प्रशासकिय अधिकृत खिमानन्द भुषालले एकल महिला आत्मनिर्भर हुदा हिंसा कम हुने बताउनु भएको छ । कृषक एकल महिलाहरु सिप सिकेर व्यवसायिक रुपमा अगाडि बढ्नु पर्ने समेत उहाँले जनाउनु भयो । एकल महिलाका समस्या पहिचान गरि आवश्यकता अनुसारका सिप नगरले प्रदान गर्दै आइरहेको छ । राज्यको मुल प्रवाहमा आउन नसकेका विभिन्न समुदायका महिलालाई सक्षम बनाउने लक्ष्य नगरको रहेको प्रमुख प्रशासकिय अधिकृत भुषालले स्पष्ट पार्नु भयो ।

एकल कृषक महिलाहरु मेहनत , हिम्मत र उत्साहका साथ तरकारी खेतीमा व्यवसायिक बन्न समेत उहाँले आग्रह गर्नु भयो ।
महिलाहरुको क्षमता अभिवृद्धि र सिपका लागि सदैव नगरले सहयोग गर्ने समेत उहाँले जनाउनु भयो । कार्यक्रममा नगरका कृषि विकास शाखाका प्रमुख लेस वहादुर केसीले ३ दिन सम्म भएको तालिमलाई व्यवहारमा उतार्न कृषक एकल महिलाहरुलाई आग्रह गर्नु भयो ।

समुहका अध्यक्ष रुपा राईको अध्यक्षता , सचिव शोभा आचार्यको सञ्चालनमा भएको तालिम समारोहमा कृषि विकास शाखा अधिकृत धनिराम आचार्य , प्रेस चौतारीका केन्द्रीय सदस्य एवं लुम्बिनी प्रदेश सहइन्चार्ज पार्वती पाण्डे , सिद्धार्थ वचत तथा ऋण सहकारीका अध्यक्ष इन्दीरा भट्राई , अधिकारकर्मी टिका कुमारी अधिकारी , राधा बेल्बासे, रुपा पालुंगे मगर लगायतले तरकारी खेतीमा एकल महिला किसान व्यसायिक बन्नु पर्नेमा जोड दिनु भएको थियो ।

नगरका ११ वटै वडाका ४० जना एकल किसान महिला सहभागी रहेको तालिमको कृषि विकास शाखा प्रमुख लेस वहादुर केशी , शाखा अधिकृत धनिराम आचार्य , सन्तोष भुषालले सहजिकरण गर्नु भएको थियो ।तालिम पश्चात महिलाहरुलाई कृषि सामाग्री र बेमौसमी तरकारी खेतीका लागि विउपल प्रदान गरिएको थियो । तरकारी खेतीको जानकारी र सामाग्री पाउदा एकल कृषक महिलाहरु खुशी भएका थिए ।