काठमाण्डौं, १६ साउन । निर्माण व्यवसायीहरूले निर्माणमा प्रयोग हुने साधनहरू तेर्स्याएर प्रधानमन्त्री कार्यालय अगाडि विरोध प्रदर्शन गरेका छन् ।
मंगलबार प्रधानमन्त्रीको सरकारी निवास बालुवाटारमा भेला भई निर्माण व्यवसायीहरूले डोजर र अन्य निर्माण यन्त्र सडकमा राखेर विरोध जनाएका हुन् । नेपाल निर्माण व्यवसायी महासंघका अध्यक्ष रवि सिंहले निर्माण व्यवसायमा भएका समस्यालाई चाँडो सम्बोधन गरी व्यवसायीहरुलाई चाँडै काममा फर्काउने वातावरण बनाउन सरकारको ध्यानाकर्षण गराए ।
४ खर्बभन्दा बढी योजनाको सुनिश्चितता गरेको भएपनि स्रोत नभएको योजनाहरूको म्याद थप गर्न लागेको उनको भनाई छ । त्यस्ता योजनाको म्याद एक वर्ष थप गर्ने भनेपनि भुक्तानीको व्यवस्थापन गर्न नसके खारेज गर्नुपर्ने सिंहले बताए । सम्झौता गरेका माग कार्यान्वयन नभएसम्म र सम्पूर्ण ठेक्काको एकमुष्ट म्याद थप नभएसम्म आन्दोलन जारी रहने उनको चेतावनी छ ।
व्यवसायीहरूले सार्वजनिक खरिद अनुगमनअघि सार्वजनिक खरिद ऐन तथा नियमावली तत्काल संशोधन गर, सम्पूर्ण ठेक्काको एकमुष्ट म्याद थप गर,जुन सुकै अवधिको ठेक्काको मूल्य समायोजन गर, व्यवहारिक माइल स्टेन खारेज गर, गुणस्तर र समयमा निर्माण हाम्रो प्रतिबद्धता, उपभोक्ताबाट निर्माण कार्य गर्ने नियम खारेज गर, खरिद नियमावलीको नियम ६ लाई कडाईका साथ लागू गर र निर्माण व्यवसायी एकता जिन्दावाद लेखेको प्लेकार्ड प्रदर्शन गरेका छन् ।
प्रतिक्रिया