कपिलवस्तु, १० असोज । कपिलवस्तु उद्योग वाणिज्य संघको आयोजनामा गत असोज ७ गते देखि सुरु भएको ढक÷तराजु नवीकरण तथा चेक जाँच कार्यक्रममा करिब २ सय जना व्यवसायीले चेक जाँच तथा नविकरण गराएका छन । व्यापार व्यवसायलाई सन्तुलित, मर्यादित र विश्वसनीय बनाउनको लागि नापतौल कार्यालय बुटबलको सहयोगमा उक्त कार्य सञ्चालन गरिएको हो ।
आज मंगलवार समापन कार्यक्रममा बोल्दै संघका अध्यक्ष डोलकराम घिमिरेले व्यवसायीहरुको सुविधाका लागि चार नम्बर मै नापतौल टोलीलाई झिकाएर कार्य सञ्चालन गरिएकोले धेरै व्यवसायीहरुले लाभ लिएको बताउनु भएको छ । उपभोक्ता ठगिने लगायतका समस्यालाई मध्यनजर गर्दै यस्तो कार्य सञ्चालन गरिएको उहाँले बताउनु भयो । व्यापारीले प्रयोगमा ल्याएका नापतौलका सामग्रीका लागि ३५ दिन भित्र अनिवार्य अनुमति लिनुपर्ने प्रावधान भएबमोजिम यस कार्य सञ्चालन गरिएको र यसलाई निरन्तरता दिने पनि बताउनु भएको छ ।
त्यस्तै कार्यक्रममा बोल्दै संघका पुर्व अध्यक्ष उमानाथ पौडेलले यस्तो महत्वपुर्ण कार्यमा संघ सङ्ग सहकार्य गरेको भन्दै नापतौल विभागलाई धन्यवाद दिनुभएको थियो । उपभोक्ताको अधिकारलाई हामिले सुनिश्चित गर्नुपर्नेमा उहाँको जोड रहेको थियो
त्यस्तै नेपाल गुणस्तर तथा नापतौल कार्यालय बुटवलका निर्देशक दिपेन्द्र रोकाहाले व्यापार व्यवसायका लागि प्रयोगमा आउने नापतौल यन्त्र र ढक समयमा नै दर्ता तथा जाँच नगराए कानूनी कारबाही भोग्नु पर्ने भएकाले पनि यो कार्य महत्वपुर्ण रहेको बताउनु भयो । व्यापारीले ढक, तराजु, मिटर, लिटर लगायत नापतौल सामग्री नापतौल कार्यालयबाट अनुमति पाएको आधिकारिक अधिकृत बिक्रेताबाट खरीद गरी सञ्चालनमा ल्याउनुपर्ने कानूनी प्रावधान रहेकाले हामि सबै यसमा सचेत हुनुपर्ने उहाँले बताउनु भएको छ । त्यस्तै निर्देशक रोकाहाले आफुहरुले उपभोक्ताहरुको अधिकारलाई मध्यनजर गर्दै ढक तराजु सम्बन्धित छडके चेकजाच गर्ने र केहि कमजोरी भेटिए कानुन बमोजिम कारबाहि गर्ने समेत चेतावनी दिनुभएको छ ।
समापन कर्यक्रममा संघका पदाधिकारी, नापतौल विभाका कर्मचारी लगायतको उपस्थिती रहेको थियो ।
प्रतिक्रिया