कपिलवस्तु, ३० चैत्र ।
कपिलवस्तुबाट १५ औं पटक सम्म पनि औषधि खुवाँउदा हात्तीपाइले रोग निर्मूल नभएपछि १६ औँ पटक औषधी खुवाइने भएको छ । यहीँ वैशाख १६ गते बाट १६ औँ पटक औषधी खुवाउँने भएको हो ।
सबैले औषधी सेवन नगर्दा कपिलवस्तुमा हात्तीपाइले रोग विरुद्धको औषधी खाने अभियान १६ औं पटक सञ्चालन गर्न लागिएको स्वास्थ्य कार्यालय कपिलवस्तुले जनाएको छ ।
सरकारले नै कपिलवस्तु सहित सातवटा जिल्लामा हात्तीपाइले विरुद्धको औषधि खुवाउने कार्यक्रम सञ्चालन गर्ने तयारी गरेको हो ।
इपिडिमियोलोजी तथा रोग नियन्त्रण महाशाखाका जनस्वास्थ्य अधिकृत राम कुमार महतोका अनुसार हात्तीपाइले रोग निवारणका लागि जोखिम समूहमा रहेका कपिलवस्तु सहित सात जिल्लामा औषधि खुवाउने कार्यक्रम सञ्चालन हुन लागेको हो ।
हात्तीपाइले रोग विरुद्ध प्रयोग भइरहेका औषधिहरू डाइथाइलकार्बामाजिन १०० एमजी र ४०० एमजीको अल्बेन्डाजोल औषधि खुवाइने महतोले बताए । जनस्वास्थ्य अधिकृत महतोका अनुसार कपिलवस्तु, रसुवा, रौतहट, सर्लाही, महोत्तरी, धनुषा र झापा जिल्लामा आम औषधि सेवन कार्यक्रम चल्ने छ ।
विहीवार जिल्लाका पत्रकारहरू सँग अन्तरक्रिया गर्दै स्वास्थ्य कार्यालयले कपिलवस्तु सहित नेपालमा गतवर्षबाट हात्तीपाइले रोगविरुद्धको आम औषधी सेवन अभियानलाई निरन्तरता दिइने बताईएको छ ।
अन्तरक्रिया कार्यक्रममा उनले यी जिल्लामा यो वर्ष औषधि खुवाइसकेपछि पुनः अध्ययन हुने र उक्त अध्ययनमा सकारात्मक नतिजा देखिए औषधि खुवाउने कार्यक्रम यसपटकको नै अन्तिम हुने उनले जानकारी दिए ।
हात्तीपाइले निवारण हुनका लागि राष्ट्रिय र जिल्ला स्तरमा माइक्रोफाइलेरियाको दर १ प्रतिशत भन्दा कम वा एन्टीजेनेमियाको दर २ प्रतिशत भन्दा कम हुनुपर्छ । हात्तीपाइले रोग विरुद्धको औषधि दुई वर्ष मुनिका बालबालिका, गर्भवती, दीर्घकालीन रोगी, एक हप्ता नपुगेका सुत्केरी र खाली पेटमा सेवन गर्न हुँदैन ।
जिल्लाका सबै पालिकामा सबैपक्षको सहकार्यमा अभियानले अन्तिम नतिजाउन्मुख रहने गरि अभियान सञ्चालन गरिने स्वास्थ्य कार्यालय कपिलवस्तुका प्रमुख नारायण प्रसाद चौधरीले बताए ।
प्रतिक्रिया