कपिलवस्तु, १० वैशाख । लुम्बिनी प्रदेशका कृषि मन्त्री भण्डारीलाल अहिरले पदबाट दिएको राजीनामा तत्काल स्वीकृत नहुने भएको छ । लुम्बिनी प्रदेश सरकार प्रवक्ता एवं स्वास्थ्य मन्त्री दीपेन्द्र पुनले कृषि मन्त्री अहिरले दिएको राजीनामा तत्काल मुख्यमन्त्री जोख बहादुर महराले स्वीकृत नगर्ने बताए ।
मुख्यमन्त्री काठमाडौँ गएको बेला अकस्मात् मन्त्री अहिरले राजीनामा दिएकाले तत्काल स्वीकृत नगर्ने प्रवक्ता पुनले बताए । उनले भने, ‘यो गठबन्धन सरकार हो, मन्त्री भन्दा पनि गठबन्धन ठुलो तर उहाँको चित्त नबुझेको विषयमा छलफल गर्न सकिन्थ्यौ एक्कासि राजीनामा दिएर ठुलो गल्ती गर्नुभयो ।’
पुनले मुख्यमन्त्रीले यो विषयमा केन्द्रीय नेताहरूसँग सल्लाह गरेर अगाडि बढ्ने बताए । लुम्बिनीमा सरकार बनाउने बेला गठबन्धनबिच आफ्नो पार्टीलाई दुई मन्त्रालय दिने सम्झौता भएको तर नदिएको भन्दै अहिरले मन्त्री पदबाट राजीनामा दिएको बताएका छन् । उनले सरकारको समर्थन भने कायम राख्ने बताए । जसपाको लुम्बिनी प्रदेशमा ३ सिट छ ।
प्रतिक्रिया