अबको ३ दिन मनसुन सक्रिय, कपिलवस्तुसहितका ३० जिल्लालाई सतर्कता अपनाउन आग्रह

कपिलवस्तु, २१ असार । अबको ३ दिन मनसुन सक्रिय हुने जल तथा मौसम विभागले जनाएको छ । विभागका अनुसार आजदेखि २४ गतेसम्म मनसुन अझै बढी सक्रिय हुने छ । यो अवधिमा कपिलवस्तुसहित ३० जिल्ला रेड जोनमा परेकाले सतर्कता अपनाउन आग्रह गरिएको हो ।

लुम्बिनीको कपिलवस्तुसंगै रुपन्देही, पाल्पा, अर्घाखाँची, गुल्मी, प्युठान, नवलपरासी पश्चिम, रोल्पा र रुकुमपुर्व रेड जोनमा परेका छन् । यस्तै गण्डकी, लुम्बिनी, कर्णाली र सुदूरपश्चिमका जिल्ला पनि उच्च जोखिममा रहेको संकेत स्वरुप विभागले ‘रेड जोन’मा राखेको हो ।

यसअघि १७ गतेदेखि २० गतेसम्मको अवधिमा ३४ जिल्लामा रेड अलर्ट जारी गरेको थियो । कर्णाली प्रदेशका जाजरकोट, दैलेख, रुकुम पश्चिम, कालिकोट, जुम्ला र हुम्लालाई पनि जल तथा मौसम विज्ञान विभागले रेड जोनमा राखेको छ । यसैगरी सुदूरपश्चिमका डडेलधुरा, डोटी, अछाम, दार्चुला, बझाङ, बैतडी र बाजुरा जिल्ला ‘रेड जोन’मा छन् ।

मनसुन सक्रिय हुँदा भारी वर्षा हुने, बाढी–पहिरो आउने, होचा भूभाग डुबान हुने, गेग्रान बहावले सडक यातायात अवरुद्ध हुने र हवाई यातायात समेत प्रभावित हुने पूर्वानुमान विभागले गरेको छ । गण्डकी, लुम्बिनी, कर्णाली र सुदूरपश्चिम प्रदेशका केही स्थानहरूमा भारीदेखि धेरै भारी वर्षा तथा थोरै स्थानहरूमा अति भारी वर्षाको समेत सम्भावना रहेको महाशाखाले जारी गरेको बुलेटिनमा उल्लेख छ ।