गुल्मी, १८ साउन । गुल्मीमा अरिङ्गालको टोकाइबाट एक जनाको मृत्यु भएको छ । जिल्लाको रुरुक्षेत्र गाउँपालिका वडा नम्बर(२ यादुङ बस्ने ३५ वर्षीय हरिबहादुर कुँवरको अरिङ्गालको टोकाइबाट मृत्युु भएको जिल्ला प्रहरी कार्यालय गुल्मीले जनाएको हो ।
बिहीबार साँझ करिब ७ः३० बजेको समयमा घर नजिकै आफ्नो बारीको छेउमा रहेको सालको रुखमा अरिङ्गाल पोल्ने क्रममा अरिङ्गालको टोकाइबाट कुँवर घाइते हुनुभएको जिल्ला प्रहरी कार्यालय गुल्मीका प्रहरी निरीक्षक रामकुमार केसीले जानकारी दिनुभयो ।
प्रहरी निरीक्षक केसीका अनुसार अरिङ्गालले शरिरको विभिन्न भागमा टोकी घाइते हुनुभएका निजलाई उपचारका लागि मिसन अस्पताल पाल्पा लगिएको थियो । घाइते हुनुभएका कुँवरको उपचारको क्रममा शुक्रबार बिहान करिब ८:२५ बजेको समयमा मृत्यु भएको उहाँले जानकारी दिनुभयो ।
प्रतिक्रिया