कोशीटप्पु राष्ट्रिय कबड्डी प्रतियोगिता, आर्मीको विजयी सुरुआत

इनरुवा (सुनसरी), २६ वैशाखः सुनसरी सदरमुकाम इनरुवामा आजदेखि प्रथम कोशीटप्पु खुला महिला राष्ट्रिय कबड्डी प्रतियोगिता सुरु भएको छ । जिल्ला खेलकुद क्लब सुनसरीको आयोजनामा इनरुवा–२ स्थित शिक्षा खेल मैदानमा सुरु भएको उद्घाटन खेलमा नेपाल आर्मी क्लबले कोशी प्रदेशलाई ४५–२५ अङ्कले पराजित गरेको छ । सो खेलमा आर्मीकी अनुजा कुलुङ राई म्यान अफ दी म्याच घोषित हुनुभयो । प्रतियोगिताको उद्घाटन राष्ट्रिय खेलकुद परिषद्का सदस्यसचिव रामचरित्र मेहताले गर्नुभएको थियो । प्रतियोगितामा सात प्रदेशका साथै नेपाल प्रहरी, सशस्त्र प्रहरी बल र नेपाल आर्मीको टोली सहभागी छ । प्रतियोगिताको विजेताले रु एक लाखसहित ट्रफी, दोस्रो हुनेले रु ५० हजारसहित ट्रफी तथा तेस्रो हुने दुई टोलीलाई रु २५–२५ हजारसहित ट्रफी, मेडल र प्रमाणपत्र प्रदान गरिने आयोजकले जनाएको छ । प्रतियोगिता यही वैशाख ३० गतेसम्म सञ्चालन हुनेछ ।