कपिलवस्तु ४ असार
कपिलवस्तुको शिवराज नगरपालिमामा पछिल्लो समय सडक, खानेपानी, शिक्षा, स्वास्थ्य तथा शहरी पूर्वाधार विकासका कामले गति लिएको छ। नगरपालिकाले स्थानीय आवश्यकतालाई मध्यनजर गर्दै विभिन्न वडामा विकास निर्माणका नयाँ योजना सञ्चालन गरिरहेको जनाएको छ। नगर क्षेत्रभित्रका मुख्य तथा सहायक सडकहरूको स्तरोन्नति, कालोपत्रे तथा नाली निर्माणलाई प्राथमिकतामा राखिएको छ। ग्रामीण बस्तीलाई बजार तथा सेवा केन्द्रसँग जोड्ने सडक विस्तारका काम अगाडि बढाइएका छन्। यसले स्थानीय नागरिकको आवागमन सहज बनाउनुका साथै कृषि उत्पादनको बजारीकरणमा समेत सहयोग पुग्ने अपेक्षा गरिएको मेयर अजय थापाको भनाइछ ।
खानेपानी तथा सरसफाइ क्षेत्रमा पनि विभिन्न योजना सञ्चालन भइरहेका छन्। सुरक्षित खानेपानीको पहुँच विस्तार गर्न नयाँ पाइपलाइन जडान, धारा निर्माण तथा पानी आपूर्ति प्रणाली सुधारका कार्यक्रम सञ्चालन गरिएको नगरपालिकाले जनाएको छ। सरसफाइ तथा वातावरण संरक्षणलाई समेत प्राथमिकता दिइएको छ। यस्तै निशुल्क शिक्षालाई कडाईका साथ कार्यान्वयन गरेका छौंमेयर थापाले भन्नु भयो ।
कृषि क्षेत्रलाई नगर विकासको प्रमुख आधार मान्दै साना सिंचाइ आयोजना, कृषि आधुनिकीकरण तथा किसानलाई प्राविधिक सहयोग उपलब्ध गराउने कार्यक्रम सञ्चालन भइरहेका छन्। सिंचाइ सुविधा विस्तारसँगै उत्पादन वृद्धि र कृषकको आयस्तर बढ्ने अपेक्षा गरिएको उपमेयर सिव कुमारी थारुको भनाइछ ।
शिक्षा तथा स्वास्थ्य पूर्वाधार सुधारका लागि विद्यालय भवन मर्मत, नयाँ कक्षाकोठा निर्माण, स्वास्थ्य चौकी स्तरोन्नति तथा आवश्यक उपकरण व्यवस्थापनका कार्यक्रमलाई पनि प्राथमिकतामा राखिएको छ। स्थानीय तहमा गुणस्तरीय सेवा प्रवाह गर्ने लक्ष्यसहित यस्ता योजनाहरू कार्यान्वयन भइरहेको थारुको तर्क छ।शहरी विकासअन्तर्गत चन्द्रौटा बजार क्षेत्रको व्यवस्थापन, सडक बत्ती विस्तार, सार्वजनिक स्थल सौन्दर्यीकरण तथा फोहोर व्यवस्थापन सुधारका कार्यक्रम सञ्चालन भइरहेका छन्। बजार क्षेत्रलाई व्यवस्थित र आकर्षक बनाउने उद्देश्यले विभिन्न पूर्वाधार निर्माणका काम अगाडि बढाइएको छ।नगरपालिकाले विकास योजनाको प्रभावकारी कार्यान्वयन, पारदर्शिता र जनसहभागितालाई जोड दिँदै आगामी वर्षहरूमा थप पूर्वाधार तथा सेवा विस्तार गर्ने लक्ष्य लिएको जनाएको छ। स्थानीयवासीले समयमै योजना सम्पन्न भएमा शिवराज नगरपालिकाको आर्थिक तथा सामाजिक विकासमा उल्लेखनीय सुधार आउने विश्वास व्यक्त गरेका छन्।
प्रतिक्रिया