कृषक सम्मानले बढायो कालीकोटका किसानको उत्साह

मान्म (कालीकोट), ३२ असार

कर्णाली प्रदेश सरकारको भूमि व्यवस्था, कृषि तथा सहकारी मन्त्रालयअन्तर्गत सञ्चालित ‘कृषि व्यवसाय प्रवद्र्धन कार्यक्रम’मार्फत कालीकोटका किसानलाई उत्कृष्ट कृषक पुरस्कार प्रदान गरिएको छ । जिल्ला कृषि विकास कार्यालयले आर्थिक वर्ष २०८२÷८३ को मुख्यमन्त्री उत्कृष्ट कृषक पुरस्कारअन्तर्गत तीन जना किसानलाई सम्मान गरेको हो । पुरस्कार पाउनेमा तिलागुफा नगरपालिका–११ का टेकबहादुर शाही प्रथम, खाँडाचक्र नगरपालिका–६ का जनकबहादुर शाही द्वितीय र रास्कोट नगरपालिका–९ का गोकर्ण न्यौपाने तृतीय हुनुभएको छ । प्रथम, द्वितीय र तृतीय हुने किसानलाई क्रमशः रु ३० हजार, रु २५ हजार र रु २० हजार नगदसहित प्रमाणपत्र प्रदान गरिएको जिल्ला कृषि विकास कार्यालयका निमित्त प्रमुख दिवाकर पन्तले जानकारी दिनुभयो । उहाँका अनुसार उत्कृष्ट किसान छनोट प्रक्रिया तोकिएको मापदण्डका आधारमा गरिएको हो । चालु आर्थिक वर्षमा १२ वटा प्रस्ताव प्राप्त भएकोमा कृषि क्षेत्रमा नयाँ अभ्यास, उत्पादन वृद्धि, व्यावसायिकता लगायतका सूचकका आधारमा किसान छनोट गरिएको उहाँले बताउनुभयो । जिल्ला समन्वय समिति कालीकोटका प्रमुख धनजीतबहादुर शाहीले कृषि जिल्लाको आर्थिक समृद्धिको मुख्य आधार भएकाले मेहनती र सफल किसानलाई सम्मान गरिनु सकारात्मक अभ्यास भएको उल्लेख गर्नुभयो । उहाँले कृषि क्षेत्रलाई व्यावसायिक, आधुनिक र प्रविधिमैत्री बनाउन स्थानीय तह र किसानबीच सहकार्य आवश्यक रहेको उल्लेख गर्नुभयो । प्रमुख जिल्ला अधिकारी जयराम भट्टराईले कृषि आत्मनिर्भरता र समृद्धिको आधार भएको बताउँदै कृषि क्षेत्रका चुनौतीलाई अवसरमा बदल्न आधुनिक प्रविधि, बजार व्यवस्थापन र सरकारी सेवाको प्रभावकारी पहुँच आवश्यक रहेको बताउनुभयो । सम्मानित किसान टेकबहादुर शाहीले सरकारको सम्मानले आफूलाई थप उत्साहित बनाएको बताउनुभयो । उहाँले निरन्तर मेहनत र नयाँ प्रविधिको प्रयोगबाट कृषिमा सफलता हासिल गर्न सकिने बताउँदै यस्ता कार्यक्रमले उत्पादन वृद्धि, कृषि व्यवसायीकरण र युवालाई कृषितर्फ आकर्षित गर्न सहयोग पुग्ने धारणा राख्नुभयो ।