तिलोत्तमा नगरपालिकाद्वारा श्रमिक मजदुरका लागि राहत घोषणा

रुपन्देही, १४ चैत । रुपन्देहिको तिलोत्तमा नगरपालिकाले लकडाउनबाट प्रभावित दैनिक मजदुरी गरेर जीविकोपार्जन गर्ने वर्ग समुदायलाई लक्षित गरी राहत घोषणा गरेको छ । विहिवार बिहान बसेको सचिवालय बैठकले लगडाउनबाट प्रभावित भई दैनिक छाक टार्न समस्या भएका परिवारलाई राहत दिने निर्णय गरेको हो । पहिलो चरणमा साँझ बिहानको छाक टार्न समस्या भएकालाई प्रति परिवार दश किलो चामल र दुई किलो दाल उपलब्ध गराउने निर्णय तिलोत्तमाले गरेको हो । टोल विकास संस्थाको सिफारिसमा नगरपालिकाले राहत उपलब्ध गराउने प्रवक्ता सुरेन्द्र श्रीले जानकारी दिनुभयो । नगरपालिकाले दैनिक ज्याला मजदुरीमा काममा लगाउने व्यक्ति, ठेकेदार, संस्था, कम्पनीलाई आफ्ना कामदारप्रतिको जवाफदेहिता निर्वाह गर्न समेत ध्यानाकर्षण गराएको छ । सचिवालय बैठकले राहत वितरणलाई व्यवस्थित बनाउन उपप्रमुख जागेश्वरी चौधरीको संयोजकत्वमा समिति गठन गरेको छ । यसअघि नगरप्रमुखले नगरबासीलाई सम्बोधन गर्दै लकडाउनका कारण कोही भोकै बस्नु नपर्ने भन्दै त्यसको जिम्मा स्थानीय सरकारले लिने उल्लेख गर्नुभएको थियो । नगर प्रमुख घिमिरेले लकडाउनले दैनिक ज्याला मजदुरी गरेर कसैलाई साँझ बिहानको छाक टार्न अत्यन्त समस्या भएको छ भने आफ्नो टोल विकास संस्थामार्फत् सम्बन्धित वडाध्यक्षलाई खबर गर्नुहुन अनुरोध गर्नुभएको छ ।