अमेरिकन आइडलको उत्कृष्ट ७ मा नेपाली युवा दिवेश पर्न सफल, नेपाली हर्षित

एजेन्सी, २९ बैशाख । विश्व प्रसिद्ध गायन प्रतिभाको खोज रियालिटी शो अमेरिकन आइडलको उपाधि यात्रामा नेपाली मूलका दिवेश पोखरेल ७ औं स्थानमा पर्दै अगाडि बढ्न सफल भएका छन् । आइडलको १८ औँ संस्करणको उपाधि यात्रामा अघि बढ्ने क्रममा दिवेश उत्कृष्ट सातभित्र पर्न सफल भएका हुन् ।  दिवेशको अमेरिकन आइडलमा सहभागितासँगै अमेरिकाका नेपाली समुदाय र नेपालमा पनि आइडलप्रति चासो बढेको छ । 

        उत्कृष्ट ११ प्रतिस्पर्धीबीचमा मतका आधारमा आइतबार सर्वाधिक मत ल्याउने उत्कृष्ट सातको छनोट गरिएको हो । अमेरिकाको कन्सास राज्यको विचिटा शहरमा बस्दै आएका २२ वर्षीय दिवेशले अमेरिकन आइडलमा आर्थन गनको नामले प्रतिस्पर्धामा छन् । दिवेशले उत्कृष्ट सातमा पर्ने क्रममा एनिमेटेड चलचित्र द लिटल मर्मेडको एलान मेनकनको शब्द र होवार्ड एस म्यानको सङ्गीत तथा एस्ले टिसडालेको गायन रहेको किस द गर्ल बोलको गीत गाएका थिए । अमेरिकाको एबिसी टेलिभिजनबाट अमेरिकन आइडल कार्यक्रम प्रसारण हुँदै आएको छ । अमेरिकाको गायन प्रतियोगितामा यति अगाडि दिवश बढ्न सफल भएसँगै नेपाली हर्षित भएका छन् ।