फूल टिप्नु पाप होइन

फूल टिप्नु पाप होइन
तिमी आकस्मिक सुन्दरताको
पछि लाग्छौ र त
अनन्त दुखाई भोगिरहेछौ
फूलको सुन्दरता
जवानीको सुन्दरता
आकृतिको सुन्दरता
सम्पन्नताको सुन्दरता
प्रेमको सुन्दरता
त्यसैले,
बनाउ कुरुप बगैंचा
कोर फोहोरी आकृतिहरु
र फुल्नदेउ
जीवनलाई प्रकृतिको बेढंगपनमा
अनि पो,
खोला निरन्तर बगिरहनेछ
तिमी निरन्तर बगिरहनेछौ
जीवन निरन्तर बगिरहनेछ

तिमी,
स्वामित्वको सुन्दरता
सम्पतिको सुन्दरता
भावनाको सुन्दरता
हेराइको सुन्दरता
सभ्यताको सुन्दरता
जातित्त्वको सुन्दरता
सफलताको सुन्दरता
र लामो यात्राको सुन्दरताको
कुरुप आकृति कोरिरहेछौ
तिमीले आफुलाई
मिलाउने नाममा
सजाउने नाममा
कसैको चित्त बुझाउने नाममा
आफ्नो जिन्दगीको टुहुरो यात्रा गरिरेहेछौ

त्यसैले ,
भत्काऊ सारा पर्खालहरु
उजाड सुन्दर बगैचाहरु
तोड सभ्यताका जन्जिरहरु
त्याग सबै वैभवहरु
अनि,
फुल्नदेउ जीवनलाई प्रकृतिमा
फुल्नदेउ फूललाई
बाटोमुनि, खोच र पाखाहरुमा
अनि भोग्न देउ जीवनलाई
आफु उभिएको माटोमा र
प्रकृतिको बसन्त शिशिरमा
त्यसैले ,
फूल टिप्नु पाप होइन
यो त यौटा जीवन भोगाइ हो।