बिन्दुले हराएको ११ तोला सुनका गहना प्रहरीले फेला पारयो

बुटवल १३ कार्तिक।हराएको ११ तोला सुनका गहना प्रहरीको खोज तलासवाट  फेला पर्नु र स्वयम गहनाधनीले फिर्ता पाउनु चलचित्र क्षेत्रको रोचक दृष्य त धेरैले देखेकै हुनु पर्छ तर बुटवलमा वास्तविक जीवनमा यस्तै घटना भएको छ । प्राप्त विवरणअुनसार   बुधबार साँझ बुटवलबाट हराएको ११ तोला सुनका गहना बुटवल प्रहरीले फेला पारेको छ । इलाका प्रहरी कार्यालय बुटवलका प्रहरी सहायक निरीक्षक नुरराज सारुको कमाण्डमा खटिएको टोलीले बुटवल–७ बसपार्कमा कपडाको झोलासहित ११ तोला सुनका गहना फेला पारेको हो ।

    कपिलबस्तुबाट बुटवल आउने क्रममा सैनामैना नगरपालिका–४ की विन्दु पोखरेलको झोला बुटवलको भुड्कीचोकबाट हराएको थियो । झोला हराएपछि उनले प्रहरीमा निवेदन दिएकी थिइन् ।निवेदनका आधारमा प्रहरीले खोजतलास सुरु गरेको थियो । फेला परेको सुनका गहना सम्बन्धित व्यक्तिलाई हस्तान्तरण गरिएको इलाका प्रहरी कार्यालय बुटवलका प्रमुख डीएसपी प्रतित सिंह राठौरले बताए ।हराएको सुनका गहना पाउँदा पोखरेलको मुहारमा खुशी छाएको थियो । पोखरेलले हराएको गहना फेला पार्ने प्रहरीलाई धन्यवाद दिँदै खुशी व्यक्त गरेकी थिइन् ।