बुटवल 12 कार्तिक । लुम्बिनी प्रदेश सरकारका आन्तरिक मामिला तथा सञ्चार मन्त्री तिलकराम शर्मा ‘हिमाल’ ले लुम्बिनी प्रदेशमा सञ्चार मैत्री विधेयक निर्माणका लागि सरकारले पहल गर्ने बताएका छन् । संचारलाई अंकुश लगाउने खालको बिधेयक प्रदेशसभामा पेश गर्ने कार्यसूचीमा चढिसकेपछि पनि सभामा पेश नगरि पत्रकार महासंघका नेताहरुसँग भेट गरेका मन्त्री शर्माले सञ्चारमैत्री बिधेयक बनाउन पहल गर्ने आश्वासन दिएका हुन् ।
सरकारले प्रस्ताव गरेको सञ्चार विधेयकमा रहेका सञ्चार विरोधी दफाहरुलाई हटाउन र सञ्चामैत्री बनाउन आवश्यक बुँदाहरु समावेश गर्ने सुझाव लिएर सञ्चार मन्त्रालय पुगेका महासंघको लुम्बिनी प्रदेश समितिको टोलीसँग कुरा गर्दै मन्त्री शर्माले पत्रकारहरुका हितमा विधेयक बनाउने कुरामा आफूले सहजीकरण एवं पहल गर्ने बताए ।
टोलीले विधेयकमा समावेश गर्नु पर्ने विषयका बुँदा तयार गरि सञ्चारमन्त्री शर्मालाई बुझाएको छ । महासंघका पदाधिकारीहरु सुरुमा विधेयक फिर्ताको अडानमा रहेपछि सरकार परिवर्तनसँगै विधेयक संशोधनको पक्षमा देखिएका छन् ।
पत्रकार महासंघको टोलीसँग छलफल गर्दै मन्त्री शर्माले भने–’जसको लागि कानून बनाउने त्यही क्षेत्रलाई नै सम्वोधन हुने गरी विधेयक ल्याउन पहल गर्दछु ।’
उनले सबैको छलफल र सहकार्यबाट नै अगाडि विधेयक बढाइने कुरामा पत्रकार महासंघका पदाधीकारीलाई आश्वस्त पार्न खोजेको भेटघाटमा सहभागी एक पत्रकारले बताए ।
प्रतिक्रिया