किसानलाई राजधानी नयाँदिल्ली प्रवेशमा रोक

नयाँदिल्ली, 13 कात्तिक । कृषि कानूनको विरोधमा आन्दोलनमा उत्रिएका किसानलाई भारतीय राजधानी नयाँदिल्ली प्रवेशमा रोक लगाउन विभिन्न नाकामा खडा गरिएका अवरोधलाई प्रहरीले हटाउन थालेको छ ।

दिल्ली प्रहरीले ठूलो संख्यामा किसानहरु उपस्थित हुने गाजीपुर बोर्डरमा बनाइएका अवरोधलाई हटाएको छ । आक्रोशित किसानलाई रोक्न प्रहरीले दिल्ली प्रवेश गर्ने केही नाकाहरुमा फलामका किला र कंक्रिटका निकै मजबुत बैरिकेडहरु खडा गरेको थियो । प्रहरीले अवरोध हटाउन थालेपछि भारतीय काँग्रेसका नेता राहुल गान्धीले एक ट्वीटमार्फत अहिले देखावटी बैरिकेड हटेको भन्दै चाँडै नै कृषि विरोधी तीन वटै कानून पनि हट्ने जिकिर गरेका छन्।

त्यसैगरी भारतीय किसान युनियनका नेता राकेश टिकैतले सडकको अवरोध हटेपछि आफ्नो उत्पादन बेच्न संसदमा जाने चेतावनी दिएका छन् । एक ट्वीटमार्फत नेता टिकैतले मोदी सरकारले अन्नदाताहरुमाथि अन्याय गरिरहेको भन्दै गरिबहरुको रोटीलाई पूँजीपतिहरुले कब्जा गरेको आरोप लगाएका छन् । सरकारले ल्याएको कृषि कानुनको विरोधमा झण्डै एक बर्षदेखि भारतीय कृषक आन्दोलित छन् ।