भलिवल प्रतियोगिता हेर्न आएकी १३ बर्षकी बालिकामाथि बलात्कार

बुटवल 13 कार्तिक । पहाडी जिल्ला रूकुम पश्चिममा एक बालिकामाथि बलात्कार भएको छ। रूकुम पश्चिमको आठविसकोट नगरपालिका १४ बाँकेज्युलामा १३ बर्षकी बालिकामाथि बलात्कार भएको हो।

जाजरकोट नलगाड-१ की ती बालिका बाँकेज्युलामा आयोजित भलिवल प्रतियोगिता हेर्न आएकी थिइन्। 

बालिकालाई आठविसकोट नगरपालिका १४ का २६ वर्षीय झलक जैसीले बलात्कार गरेको भन्दै प्रहरीमा जाहेरी परेको छ।

बालिकामाथि बलात्कार भएको सम्बन्धी जाहेरी दर्ता भइसकेको र अभियुक्त जैसीको खोजी जारी राखिएको प्रहरीले जनाएको छ।

साथै बालिकालाई आठविसकोट नगर अस्पतालमा सामान्य उपचार गरेर थप उपचारका लागि बिहीबार नेपालगञ्ज पठाइएको छ।बालिकाको स्वास्थ्य अवस्था गम्भीर रहेको प्रहरीले जनाएको छ।