कपिलवस्तुमा ट्याक्टर दुर्घटना हुँदा दुईको मृत्यु, चार घाइते

कपिलवस्तु, पुस २० गते । कपिलवस्तुको बुद्धभूमि नगरपालिका ३ रनगाईमा ट्याक्टर दुर्घटना हुँदा दुई जनाको मृत्यु भएको छ । लु ४ त २४०२ नम्बरको ट्याक्टर बिहान ७ बजे सडकबाट पाँच मिटर तल खसेको थियो । घटनामा परी मृत्यु हुनेका सोही ठाउँका वर्ष ४८ की शिवकुमारी थारु र वर्ष १६ की वालिका फुलकुमारी थारु रहेको इलाका प्रहरी कार्यालय गोरुसिङ्गेले जनाएको छ । बालुवा लिनको लागि बुद्धभूमि ४ बुड्ढी जाने क्रममा बिहान ७ बजे दुर्घटना भएको थियो ।
यसैगरी घटनामा परी बलराम सुनार, कृष्ण बिक, सरिता थारु र सीमा थारु घाइते हुनुभएको छ । बलरामको अवस्था गम्भीर रहेको प्रहरी निरीक्षक लीलाराम आचार्यले बताउनुभयो । मृतक दुई जना बालुवा लोड गर्ने श्रमिक रहेको बडा नं. ३ का वडा अध्यक्ष गोविन्द प्रसाद आचार्यले बताउनुभयो ।