पार्टीको आन्तरिक विषय अध्ययन गर्न पाँच सदस्यीय कार्यदल

असार १५
नेकपा (एमाले) गुल्मीले पार्टीभित्र अराजक तत्वहरुको अध्ययन गर्न ५ सदस्यीय अध्ययन कार्यदल गठन गरेको छ । सो पार्टीले पत्रकार सम्मेलनको आयोजना गरी गत बैशाख ३० मा सम्पन्न स्थानीय तह निर्वाचनमा पार्टीभित्र आन्तरिक असमझदारी, असन्तुष्टि, असहयोग मुख्य कारण रहेको भन्दै पार्टीले अध्ययन कार्यदल गठन गरेको जनाएको छ ।
कार्यदलमा केन्द्रीय सदस्य तथा जिल्ला सहइन्चार्ज जंग नेपालीको नेतृत्वमा पाँच सदस्य रहेको अध्ययन कार्यदल गठन गरेको जिल्ला अध्यक्ष बालसिंह काउछाले जानकारी दिनुभयो । पार्टीभित्रै रहेर संगठनात्मक अराजकताहरु प्रकट भएको भन्दै अध्ययन कार्यदल गठन गरिएको र अध्ययन कार्यदलको प्रतिवेदनको आधारमा प्रमाणीत भए कारवाही गर्ने काउछाले बताउनुभयो ।
निर्वाचनमा कर्मचारी खटनपटन, प्रहरी, प्रशासन र सबै शक्ति एमालेबिरुद्ध खनिएको समेत काउछाले आरोप लगाउनुभयो । पार्टीले गत बैशाखको निर्वाचनमा भएको कमी कमजोरीबाट शिक्षा लिदैँ आगामी निर्वाचनमा एकताबद्ध भएर लाग्ने निष्कर्ष निकालेको छ ।