कपिलवस्तु साझेदारी बनको भवन शिलान्यास, सेवा प्रवाहमा सहजता हुने

चन्द्रौटा,१९ असार ।

शिवराज नगरपालिका ३ खरेन्द्रपुरमा कपिलवस्तु साझेदारी बन व्यवस्थापन समितिको प्रशासनिक भवनको शिलान्यास भएको छ । आइतबार डिभिजन बन गौतमबद्धका प्रमुख दधिलाल कँडेल र साझेदारी बनका अध्यक्ष गंगेशनाथ तिवारीले संयुक्त रूपमा भवनको शिलान्यास गर्नुभएको हो । भवनको शिलान्यासको अवसरमा बोल्दै डिभिजन प्रमुख कँडेलले लामो समय देखि भाडामा बसेर सेवा प्रवाह गरेको साझेदारीले आफ्नै भवन बनाउनु सकारात्मक कुरा भएको बताउनुभयो ।

भवन निर्माण पश्चात् बनका उपभोक्तालाई सेवा प्रवाहमा सहजता हुने विश्वास व्यक्त गर्नुभयो । कपिलवस्तु साझेदारी बनले विगत देखि नै बज संरक्षणको लागि राम्रो काम गरेको उल्लेख गर्दै आगामी दिनमा पनि निरन्तरता दिन आग्रह गर्नुभयो ।
कार्यक्रममा साझेदारी बनका अध्यक्ष गंगेशनाथ तिवारीले ४ पालिकामा रहेका उपभोक्ताहरूलाई बनको भवन निर्माण पश्चात् सेवा लिन सहज हुने बताउनुभयो । विगतको वर्ष देखिनै भवन निर्माणको तयारी गरेकोले अहिले शिलान्यास गर्न सफल भएको बताउनुभयो । एउटा हल सहित निर्माण हुने उक्त भवन निश्चित समयमा सम्पन्न गर्नुपर्ने बताउनुभयो ।

४ पालिकाका १८ हजार घरधुरी तथा १ लाख १७ हजार जनसख्या बन वाट लाभान्वित भएको तिवारीले बताउनुभयो । बनले निरन्तर रूपमा अतिक्रमित बनमा वृक्षारोपण लगायतका बन संरक्षण र चोरी तस्करी रोक्न विभिन्न अभियानहरू सञ्चालन गरेको बताउनुभयो । रु ६६ लाख लागतमा ६ कोठे भवन २ वर्षको अवधिमा सम्पन्न सहायक बन अधिकृत एजाज अन्सारीले बताउनुभयो ।