घोराही २४ कात्तिक । दाङको बङ्गलाचुली गाउँपालिका–५, मुर्कुटीका दलबहादुर खत्रीले बाख्रापालनबाट राम्रो आम्दानी गर्दै आउनुभएको छ ।
दस वर्षअघि दाजुहरू हिमराज खत्री र एनुराज खत्रीसँग मिलेर सुरु गरेको लेकाली बाख्रापालन तथा दाना उद्योगमा अहिले साना, ठूला २१० बाख्रा छन् । दुई वर्षअघिदेखि उहाँ एक्लै यो व्यवसाय चलाउँदै आउनुभएको छ ।
२०६९ सालमा बैङ्कबाट लिएको नौ लाख रुपियाँ ऋणसहित २४ लाख रुपियाँ लगानी गरेर प्युठानको माण्डवी गाउँपालिका–२, तारीवाङमा बाख्रापालन व्यवसाय सुरु गरेको व्यवसायी खत्रीले बताउनुभयो । उहाँको घर दाङ जिल्ला र फार्म प्युठान जिल्लामा पर्छ । यो व्यवसायबाट अहिले वार्षिक दस लाख रुपियाँको खुद आम्दानी भइरहेको उहाँले बताउनुभयो । उहाँको फार्ममा बोयर जातका बाख्रा मात्रै छन् ।
खत्रीले १२० रोपनी जग्गामा घाँसखेती पनि गरिरहनुभएको छ भने बाख्राका लागि दानासमेत उत्पादन गर्दै आउनुभएको छ । पहाडी क्षेत्र भएकाले चरनका लागि समस्या नहुने उहाँले बताउनुभयो ।
गाउँकै विद्यालयमा शिक्षण पेसा गर्ने खत्री दुई पटक रोजगारीका लागि विदेशसमेत जानुभएको थियो तर विदेशमा सोचेजस्तो नभएपछि आफ्नै ठाउँमा केही गरौँ भन्ने उद्देश्यले बाख्रापालन सुरु गरेको उहाँले बताउनुभयो । “एक पटक सिङ्गापुर र अर्को पटक बहराइन गएको थिएँ । तर, दुवै ठाउँमा भनेजस्तो कमाइ हुन सकेन । त्यसैले सिङ्गापुरबाट छ महिना र बहराइनबाट एक महिनामै फर्किएँ,” दलबहादुर भन्नुभयो । खत्रीले एक वर्षमा करिब १८ लाख रुपियाँको बोयरका पाठापाठी र माउ बिक्री गर्ने गरेको बताउनुभयो । यसमा दस लाख रुपियाँसम्म बचत हुने गरेको उहाँले बताउनुभयो ।
२४ कार्तिक २०७९, बिहिबार
प्रतिक्रिया