कामीरिता २८ औं पटक सगरमाथामा ,सबैभन्दा धेरैपटक पुग्ने कीर्तिमान कायम

जेष्ठ ९, काठमाडौँ — सोलुखुम्बुका कामीरिता शेर्पाले मंगलबार बिहान २८ औं पटक सगरमाथा आरोहण गरेसँगै उहाले विश्वकै अग्लो हिमाल सगरमाथामा सबैभन्दा धेरैपटक पुग्ने कीर्तिमान कायम गर्नुभएको छ ।उहा आवद्ध सेभेन समिट ट्रेक्स प्रालिका अध्यक्ष मिग्मा शेर्पाका अनुसार, कामीरिता मंगलबार बिहान ९ बजेर २० मिनेटमा सगरमाथाको चुचुरोमा पुगेका थिए । वसन्तकालीन सिजनमा उहा सगरमाथा चुचुरोमा दोस्रोपटक पुग्नुभएको हो । बुधबार उहा २७ औं पटक सगरमाथा चुचुरोमा पुग्नुभएको थियो । तर, उहाकै २७ औं रेकर्ड बराबरीमा सोमबार सोलुखुम्बुको पाङबोचेका पासाङ दावा शेर्पाको पनि रेकर्ड कायम भएपछि सगरमाथामा सर्वाधिक आरोहण गर्नेको संख्या दुई पुगेको थियो । सेभेन समिटका अधिकृत थानेश्वर गुरागाईंका अनुसार, कामीरिता मंगलबार आरोहण दलमा रहेका विदेशीहरुसँगै शिखर पुगेका थिए । उहा शुक्रबारसम्म काठमाडौं फर्किने भनिएको छ ।