दाङमा एक छात्राले लगाइन् विद्यालयका प्रशासन प्रमुखले आफूमाथि यौन दुर्व्यवहार गरेको आरोप

दाङ, ०७ असार । दाङमा एक छात्राले विद्यालयका प्रशासन प्रमुखले आफूमाथि यौन दुर्व्यवहार गरेको आरोप लगाएकी छन् ।पद्मोदय पब्लिक नमूना उच्च माध्यमिक विद्यालयकी एक छात्राले सामाजिक सञ्जालबाट सोही विद्यालयका प्रशासन प्रमुख मिनेश श्रेष्ठले आफू माथि यौन दुर्व्यवहार गरेको आरोप लगाएकी हुन् ।

उनले बुधबार फेसबुकमा लेखेकी छन्, ‘के सर भनेको कुममा हात राख्ने, यताउति गर्ने हो ?’ श्रेष्ठले घटनाबारे कसैलाई बताए आफूलाई मार्नेसम्मको धम्की दिएको पनि ती छात्राले फेसबुकमा लेखेकी छन् । ‘आज यस्तो मसँग भयो भोलि अरु कोहीसँग हुन सक्छ । त्यो बेला पनि हामी केटीहरु कति सहने ?’ उनले लेखेकी छन् ।

छात्रामाथि भएको दुर्व्यवहार भएको विषयमा सामाजिक सञ्जालमा विरोध भइरहेको छ । बिहीबार विद्यालयका विद्यार्थीले आरोपित श्रेष्ठलाई कारबाहीको माग राख्दै नाराबाजी गरेका छन् ।

विद्यालयका निमित्त प्रधानाध्यापक मोहन अधिकारीले उक्त घटनाबारे छात्रा र आरोपित श्रेष्ठसँग बुझ्ने काम भइरहेको बताए ।