कपिलवस्तु, १० असार ।
कपिलवस्तुको विजयनगर गाउँपालिकामा अवैध काठ बरामद गरिएको छ । ८० क्विन्टल सिसौ र सगुन जातको स्टिप काठ बरामद गरिएको प्रहरीले जनाएको छ ।
सशस्त्र प्रहरी बल नेपाल (बिओपी) विजयनगर र प्रहरी चौकी ठाकुरापुरको संयुक्त टोलीले उक्त अवैध काठ बरामद गरेको हो । सशस्त्र प्रहरी बल नेपाल विजयनगरबाट सशस्त्र प्रहरी नायब निरीक्षक भरत प्रसाद चौधरी र प्रहरी चौकी ठाकुरापुरबाट प्रहरी सहायक निरीक्षक धन बहदुर अधिकारीको नेतृत्वको संयुकत टोलीले काठ बरामद गरेको हो ।
सशस्त्र प्रहरी बल नेपाल विजयनगरका प्रहरी निरीक्षक झक्कु प्रसाद शर्माले गाउँपालिकाको वडा नम्बर ५ कटनियाबाट उक्त अवैध काठ बरामद गरिएको जानकारी दिए । उनले तस्करले भारतबाट ल्याई लुकाईछिपाई राखेको अवस्थामा उक्त काठ बरामद गरिएको बताए ।
काठको मुल्य १ लाख ४ हजार रुपैयाँ बराबरको रहेको उनले जनाए । बरामद गरिएको अवैध काठ सब(डिभिजन वन कार्यालय ठाकुरापुरमा बुझाइएको प्रहरीले जनाएको छ ।
प्रतिक्रिया