सोलुखुम्बुमा भएको हेलिकप्टर दुर्घटनाबारे अध्ययन गर्न सरकारले समिति बनाउने

काठमाण्डौ, २६ असार । सोलुखुम्बुबाट काठमाण्डौका लागि उडेको मनाङ एअरको हेलिकप्टर दुर्घटनाबारे अध्ययन गर्न सरकारले छानबिन समिति बनाउने भएको छ ।

मङ्गलवार जनकपुरधाममा आयोजित नेपाल विद्यापति मैथिली पुरस्कार अर्पण समारोहपछि सञ्चारकर्मीसँग कुरा गर्दै संस्कृति, पर्यटन तथा नागरिक उड्डयन मन्त्री सुदन किरातीले यो जानकारी दिनुभयो । उहाँले आफू जनकपुरबाट फर्किएपछि सके आजै र त्यो नभए बुधवारसम्ममा छानबिन समिति बनाएर मनाङ एअरको ९–एन–एमभी कलसाइन भएको हेलिकप्टर दुर्घटनाबारे अध्ययन गरिने बताउनुभयो ।

उहाँले भन्नुभयो, ‘हामीले पहिलो दिनदेखि नै सुरक्षा पहिलो भन्ने नारा उच्चारण गरेका छौँ । सुरक्षामा कुनै सम्झौता हुँदैन । दुर्घटना नहोस् भनेर नै हामीले सेफ्टी फर्स्ट भनेका छौँ, हाम्रो पहिलो सर्त सुरक्षा हो । सोलुखुम्बुका भएको हेलिकप्टर दुर्घटनाबारे अध्ययन गर्न अब छानबिन समिति बन्छ । भोलिसम्ममा गठन हुन्छ ।’

मङ्गलवार बिहान मनाङ एअरको हेलिकप्टर सोलुखुम्बुको लिखुपिकेमा दुर्घटना हुँदा एक नेपाली पाइलटसहित पाँच मेक्सिकोका नागरिकको ज्यान गएको छ ।