तौलिहवा तौलेश्वरनाथ मन्दिरबाट १ लाख ४० हजार भेटी सङ्कलन

कपिलबस्तु, २७ फागुन । जिल्लाको सदरमुकाम तौलिहवास्थित तौलेश्वरनाथ महादेव मन्दिरबाट एक लाखभन्दा बढी भेटी सङ्कलन भएको छ । महाशिवरात्रिको अवसरमा तौलेश्वरनाथ महादेव मन्दिरमा उक्त भेटी संकलन भएको हो ।

नेपालकै ठुलो शिवलिङ्ग दाबी गरिएकोे मन्दिरमा महाशिवरात्रिमा हजारौं भक्तजनले पूजापाठ गर्ने गर्छन् । मन्दिर व्यवस्थापन समितिका अध्यक्ष रामकुमार गुप्ताका अनुसार महाशिवरात्रीिमा तौलेश्वरनाथ महादेव मन्दिरमा १ लाख ४० हजार भेटी सङ्कलन भएको बताउनुभयो ।

मन्दिरमा छिमेकी जिल्ला, अर्घाखाँची, रुपन्देही, भारतका सिद्धार्थनगर, नौगढ, गोरखपुर, बलरामपुर तथा जिल्लाका विभिन्न स्थानबाट आएका भक्तजनले मन्दिरमा पूजापाठ गरेको उहाँको भनाइ छ ।

भगवान गौतमबुद्धको जन्म भएपछि राजधानी तिलौराकोट फर्किदा उहाँका पिता राजा शुद्धोधनले यही मन्दिरमा दर्शन गरेको जनविश्वास छ । मन्दिरमा साउन र फागुन गरी दुई पटक मेला लाग्ने गर्छ । १८७२ सालमा स्थापित तौलेश्वरनाथ महादेव मन्दिर तराईवासी हिन्दु धर्मावलम्बीको आस्थाको केन्द्र बनेको छ ।