भैरहवा, २९ फागुन ।
लुम्बिनी गुरुयोजना क्षेत्रका बिहार तथा गुम्बाहरुमा व्यवसायिक रुपमा पर्यटक राख्ने व्यवस्था अविलम्ब स्थायी रुपमा रोक लगाउन व्यवसायीहरुले माग गरेका छन् । लुम्बिनी होटल संघ, नेपालले मंगलबार लुम्बिनी विकास कोषलाई ज्ञापनपत्र बुझाउँदै ७ दिनभित्र स्थायी रुपमा समाधान गर्न ठोस कार्य अगाडि बढाउन आग्रह गरेको छ ।
संघका अध्यक्ष गोविन्द प्रसाद ज्ञवालीले बिहार क्षेत्रका संरचनाहरु गुरुयोजना क्षेत्र बाहिर रहेका होटलहरुसँग प्रतिष्पर्धा गर्दै पर्यटक राख्ने ठाउँमा फेरिएको बताए । उनले भने, ‘सयौं कोठाहरु पर्यटक राख्ने गरी बनाइएका छन् । बिहार र गुम्बा भनिने ठाउँहरु बैद्ध आध्यात्मिकता र बौद्ध भावनाको नमूना होइन । व्यपारको थलो बनेका छन् । यस अनियमितता र गुरुयोजनाको मर्मविपरीतको कार्यको संरक्षण यो वा त्यो नाम दिएर लुम्बिनी विकास कोषका केही मानिसले गर्दै आएका छन् । यसले निजी क्षेत्रको ठूलो लगानी, पेशा व्यवसायलाई संकटमा पुर्याएको छ ।’
दशकौंदेखि उठ्दै उठाउँदै आएको यो समस्याले अहिले अप्रिय स्थितिको सिर्जना गरेको र स्थानीय व्यवसायीको धैर्यताको सीमा समाप्त भएको तथा अब यस भन्दा अघि पर्खन सक्ने अवस्था नरहेको उनको भनाइ छ ।
विगतमा राम्रो व्यवसाय सञ्चालनमा रहेका लुम्बिनी क्षेत्रका होटलहरुमध्ये गत वर्ष खोलिएका १० भन्दा बढी स्थायी रुपमा बन्द भएको र यो वर्ष थप होटलहरु बन्द हुने अवस्थामा पुगेको ज्ञवालीले बताए ।
संघका महासचिव पुरुषोत्तम अर्यालले बिहार तथा गुम्बालाई होटलको रुपमा सञ्चालन गरेर होटल व्यवसायलाई धरासायी बनाइएको बताए ।
लुम्बिनी विकास कोषका कोषाध्यक्ष ढुण्डिराज भट्टराई (सिद्धिचरण)लाई संघले बुझाएको ज्ञापनपत्र प्रधानमन्त्री पुष्पकमल दाहाल (प्रचण्ड) र मन्त्री, संस्कृति तथा नागरिक उडड्यन तथा कोषका अध्यक्ष हितमान तामाङलाई बोधार्थ पठाइएको संघका कानूनी सल्लाहकार अधिवक्ता प्रख्यात बन्जाडेले बताए । उनले समस्या समाधानका लागि सम्बन्धित निकायले ध्यान दिनुपर्ने माग गरे ।
ज्ञापनपत्र बुझ्दै कोषाध्यक्ष भट्टराईले व्यवसायीको माग जायज भएको र कुनै न कुनै रुपमा सम्बोधन गर्नुपर्ने बताए । उनले मसिनो गरी अध्ययन हुन जरुरी रहेको बताए ।
प्रतिक्रिया