प्रहरीले प्रदान गर्ने सेवा गुणस्तरीय बनाउन निर्देशन

नेपालगन्ज (बाँके), २१ माघः नेपाल प्रहरीका महानिरीक्षक दानबहादुर कार्कीले प्रहरीले प्रदान गर्ने सेवा गुणस्तरीय बनाउन निर्देशन दिनुभएको छ ।
इलाका प्रहरी कार्यालय, कोहलपुमा आज आयोजना भएको महिला, बालबालिका तथा ज्येष्ठ नागरिक सेवा केन्द्र, नवनिर्मित भवनको शुभारम्भ गर्दै उहाँले नागरिकको सेवा गर्ने भावनाका साथ अनुशासित भई व्यावसायिक र उच्च निष्ठाका साथ कार्य सम्पादन गर्न आग्रह गर्नुभयो ।
महानिरीक्षक कार्कीले भन्नुभयो,“प्रहरी सेवा मात्रै होइन, यो एउटा जीवनशैली पनि हो । त्यसैले सत्य, निष्ठा, सेवाभाव र सुरक्षाको प्रत्याभूत गर्न जोस र जाँगर चाहिन्छ । नागरिकको सेवा र सुरक्षाका लागि राज्यका प्रतिनिधिका रूपमा गाउँगाउँमा प्रभावकारी काममा ध्यान दिनुस् ।”
उहाँले हिंसामा परेका महिला, बालबालिका तथा ज्येष्ठ नागरिकलाई सेवा दिँदा गोपनीयतालाई समेत कायम राख्नेगरी संयन्त्र निर्माण गरिने विश्वास व्यक्त गर्नुभयो ।
लुम्बिनी प्रदेश प्रहरी प्रमुख प्रहरी नायब महानिरीक्षक भूपेन्द्रबहादुर खत्रीको अध्यक्षतामा भएको कार्यक्रममा बाँकेका प्रमुख जिल्ला अधिकारी दिलकुमार तामाङलगायतले प्रहरीलाई जनमैत्री हुन सुझाव दिनुभएको थियो ।
उक्त भवन बेलायत सरकारको सहयोगमा रु दुई करोड १४ लाख ७३ हजार १०७ लगातमा निर्माण भएको हो । यसअघि महानिरीक्षक कार्कीले कपिलवस्तुमा पनि नवनिर्मित भवनको शुभारम्भ गर्नुभएको थियो ।