छैटौैँ कटारी गोल्डकपः झापा सेमिफाइनल प्रवेश

कटारी (उदयपुर), ३० चैतः उदयपुरको कटारीमा शनिबारदेखि जारी छैटौँ कटारी अन्तरराष्ट्रिय आमन्त्रित मेयर गोल्डकप नकाउट फुटबल प्रतियोगितामा चात्या फुटबल क्लब झापा सेमिफाइनल प्रवेश गरेको छ । आज सम्पन्न खेलमा डिफेन्डिङ च्याम्पियन च्याम्पियन ब्वाइज काठमाडौँलाई ३–२ गोल अन्तरले पराजित गर्दै झापाले अन्तिम चारमा आफ्नो स्थान सुरक्षित गरेको हो । खेलको पहिलो हाफमा च्याम्पियनका लागि १० मिनेटमा सविन राईले गोल गर्दै अग्रता लिएका थिए । तर पहिलो हाफको अतिरिक्त समयमा झापाका लागि फागुराम थारुले गोल गर्दै खेल बराबरीमा ल्याएका थिए । दोस्रो हाफ सुरु भएलगत्तै झापाका मिलन राईले गोल गरेर अग्रता लिए । पुनः च्याम्पियनका लागि दगेन राईले दोस्रो हाफको २३औँ मिनेटमा गोल गरेर बराबरी बनाएका थिए । दोस्रो हाफको ३०औँ मिनेटमा झापाका लागि मिलन लिम्बूले गोल गरेपछि झापाको गोल सङ्ख्या तीन पुगेको हो । त्यसपछि दुवै टिमबाट गोल हुन सकेन । आजको खेलको म्यान अफ द म्याच झापाका मिलन राई घोषित भएका छन् । उनलाई आयोजक कटारी नगर खेलकुद विकास समितिका अध्यक्ष दीपक राईले नगद पाँच हजारका साथमा ट्रफी र मेडल प्रदान गर्नुभयो । प्रतियोगिताको विजेताले नगद रु पाँच लाखका साथमा ट्रफी, मेडल र प्रमाणपत्र हात पार्नेछन् । त्यसैगरी उपविजेताले नगद रु तीन लाखका साथमा ट्रफी, मेडल र प्रमाणपत्र प्राप्त गर्नेछन् । आठ टिम सहभागी प्रतियोगिता आगामी वैशाख ५ गते सम्पन्न हुने समितिका उपाध्यक्ष राजकुमार थापा क्षेत्रीले बताउनुभयो । प्रतियोगिताको पहिलो चरणको अन्तिम खेल मङ्गलबार केराबारी फुटबल क्लब, मोरङ र पाँचौँ कटारी गोल्डकपको उपविजेता शलेस युथ क्लब सिरहाबीच हुनेछ ।