कोरोना कहरः भारतले आइतबारदेखि नेपालसहितका सीमानाका बन्द गर्दै

काठमाडौं, १ चैत । कोरोना भाइरसको कहरसँगै महामारी रोक्न भारतले आइतबार राति १२ बजेदेखि लागू हुने गरी नेपाल, भुटान र म्यानमारका सीमानाका बन्द गर्ने निर्णय गरेको छ । भारतीय गृह मन्त्रालयको फरेनर्स डिभिजनअन्तर्गतको अध्यागमन सेक्सनका तर्फबाट उपसचिव समिम अहमदद्वारा शुक्रबार साँझ जारी सूचनामा नेपालीहरूको आवतजावत प्रभावित नहुने स्पष्ट पारेका छन् । भारतले नेपालका चारसहित चार मुलुकका २० नाकाबाट विदेशी यात्रुहरूको आवागमन बन्द गर्ने समाचारहरु सार्वजनिक भएका छन् ।

        भारतीय प्रधानमन्त्री नरेन्द्र मोदीले सार्क मुलुकका नेतृत्वबीच कोरोना नियन्त्रणका लागि कठोर रणनीति तय गर्न सहकार्य गर्नुपर्ने धारणा सार्वजनिक गरेकै दिन भारतले नेपाली र भुटानी नागरिकबाहेकका लागि सबै सीमानाका बन्द गर्ने निर्णय गरेर उक्त कदम चालेको हो । कोरोनाका कारण भारतमा एक जनाको निधन भइसकेको छ भने करिब ८ दर्जनमा कोरोना संक्रमण देखिएको छ ।