भारत कोरोनाको सूचीमा विश्वमा चौथो, संक्रमितको संख्या ३ लाख ९ हजार

एजेन्सी,
३१ जेठ ।  एसियाली मुलुकमा सबैभन्दा बढी कोरोना
भाइरसको संक्रमण देखिएको भारत कोरोना संक्रमणको सूचीमा चौथो नम्बरमा पुगेको छ । इटलीलाई कोरोना संक्रमणमा जितेको भारतले स्पेन र युकेलाई पनि पछि पार्दै चौथो नम्बरको सूचीमा पुगेको वल्डोमिर्टसको तथ्याङ्कमा उल्लेख छ । यो सँगै भारतमा कोरोना भाइरस संक्रमितको संख्या ३ लाख नाघेको छ । पछिल्लो
२४ घण्टामा ११ हजार ३२० जना संक्रमित थपिएसँगै भारतमा कोरोना भाइरस संक्रमण हुने मानिसको संख्या ३ लाख ९ हजार ६०३ पुगेको हो । भारतमा एकैदिन थप ३८९ जनाको मृत्यु हुँदा ज्यान गुमाउनेको संख्या ८ हजार ८९० पुगेको छ ।

        कोरोना संक्रमितमध्ये १ लाख ५४ हजार २३१ जना संक्रमणमुक्त भएका छन् । कोराना भाइरस (कोभिड–१९) को संक्रमण फैलिने क्रम नरोकिएपछि भारतमा मार्च २४ देखिको लकडाउन पाँचौ चरण थप्दै जुन ३० सम्म पुर्‍याइएको छ । तर उक्त लकडाउन जुन १ देखि क्रमिक रूपमा खुकुलो बनाउँदै गएको छ । भारतमा लकडाउन खुकुलो भएसँगै संक्रमितहरु पनि बढ्दै गएका छन् ।