सिरहा, २५ भदौं । सिरहा सदरमुकाम स्थित जिल्ला कारागारका ५९ जना कैदी बन्दीमा एकैपल्ट कोरोना भाइरस संक्रमण देखिएको छ ।केही दिनअघि पुर्पक्षका लागि ल्याइएका ७ जना थुनुवामा कोरोना संक्रमण देखिएपछि उनीहरुको कन्ट्याक्ट ट्रेसिङ्गको आधारमा अन्यको जाँच गराउँदा ५९ जनामा संक्रमण देखापरेको कारागारका निमित्त प्रमुख बबिता महतोले जानकारी दिइन् ।
‘नयाँ आएका सात जना थुनुवालाई छुट्टै ठाउँमा राखेका थियौं । तर, उनीहरुलाई ज्वरो आएपछि जाँच गराउँदा पोजेटिभ देखिएको थियो,’ महतोले भनिन्, ‘उनीहरुमा पोजेटिभ देखिएपछि अन्यको पनि परीक्षण गराएका थियौं ।’ महतोले पहिला देखिएका ७ जना संक्रमितको कोरोना रिपोर्ट नेगेटिभ आइसकेको जानकारी दिइन् ।महतोले प्रत्येक वर्ष भदौ महिनामा कैदी बन्दीमा भाइरल ज्वरो देखापरेको बताउँदै यस पटक पनि देखिँदा कोरोनाको आशंकामा परीक्षण गराइएको बताइन् ।
यसअघि रिहा गरिएको थियो २१ कैदी बन्दी
यसअघि सिरहा कारागारका २१ कैदी बन्दीलाई कोरोना भाइरस संक्रमण सर्ने भन्दै रिहा गरिएको थियो । गत चैतको दोस्रो साता जिल्ला अदालतको आदेशमा एक वर्षभन्दा कम समयको कैद सजाय पाएका उनीहरुलाई रिहा गरिएको थियो ।सिरहा कारागारको १५० जना कैदी बन्दी राख्ने क्षमता छ । तर, अहिले कारागारमा ५९६ जना कैदी बन्दीलाई राखिएको छ । यसमध्ये १८ जना महिला र २ जना आश्रित बालबालिका रहेको कारागार प्रमुख महतोले बताइन् ।
प्रतिक्रिया