रुपन्देही २३ असार । रुपन्देहीको सैनामैना नगरपालिकामा सिलाईकटाई ( हेभी खुट्टे ) मेशिन वितरण गरिएको छ । मुख्यमन्त्री ग्रामीण विकास तथा रोजगार कार्यक्रम अन्तर्गत नगरपालिकाका सबै वडाका गरि २५ जना महिलाहरुलाई वुधवार एक कार्यक्रमको आयोजना गरि उक्त मेशिन वितरण गरिएको हो ।
नगरको महिला तथा बालबालिका शाखाको आयोजनामा विपन्न घरपरिवारका महिलाहरुलाई ड्रेस मेकर सहित करिब ४ लाखको लागतमा मेशिन प्रदान गरिएको हो । उक्त मेशिन सैनामैना नगरपालिका प्रमुख चित्र बहादुर कार्की, उपप्रमुख बिना राना र प्रमुख प्रशासकीय अधिकृत टेकराज पन्थीले संयुक्त रुपमा हस्तान्तरण गर्नुभयो ।
हस्तान्तरण कार्यक्रममा बोल्दै नगर प्रमुख चित्र बहादुर कार्कीले नगरपालिकाले महिलाहरुलाई व्यवसायिक र अत्मनिर्भर बनाउन हस्तकला, सिलाइकटाई, ब्युटीपार्लर लगायतका तालिमहरू सञ्चालन गर्दै आईरहेको बताउनुभयो । कमजोर आर्थिक अवस्था भएका महिलाहरुका लागि उनीहरुको आयआर्जनमा थप टेवा पुगोस् भन्ने हेतुले सिलाई मेशिन वितरण गरिएको प्रमुख प्रशासकीय अधिकृत टेकराज पन्थीले बताउनुभयो ।
प्रतिक्रिया