पेस्तोलसहित सम्पर्कविहीन प्रहरी जवान मृत फेला

सुर्खेत ३० बैशाख । सुर्खेतमा एक जना प्रहरी जवान मृत भेटिएका छन् । सिम्ता गाउँपालिका वडा नम्बर ३ मा रहेको आग्रीगाउँ प्रहरी चौकीमा कार्यरत प्रहरी जवान नरेन्द्र खड्का मंगलबार बिहान  मृत अवस्थामा भेटिएका हुन् ।  उनी राति दुई बजेदेखि सम्पर्कविहीन भएकोर बिहान मृत अवस्थामा भेटिएको जिल्ला प्रहरी कार्यालय सुर्खेतका प्रहरी निरीक्षक तथा सूचना अधिकारी गोपाल रायमाझीले जानकारी दिनुभयो । एक थान पेस्तोलसहित सम्पर्कविहीन खड्काको शव बिहान नौ बजेतिर चौकीदेखि झण्डै पाँच सय मिटरको दुरीमा कन्चटमा गोली लागेको अवस्थामा फेला परेको हो । खड्काको आत्महत्या वा हत्या के हो भन्ने विषयमा अनुसन्धान भइरहेको प्रहरीले जनाएको छ । अहिले सुर्खेत प्रहरी प्रमुख दिल्लीराज पन्तसहितको टोली घटनास्थल तर्फ गएको सूचना अधिकारी रायमाझीले बताउनुभयो ।