दाङ, १७ भदौः
रसुवाको भोटेकोशीमा यही भदौ १० गते गएको बाढीबाट प्रभावित नागरिकको राहत, उद्धार तथा पुनःस्थापनाका लागि दाङमा राहत रकम जुटाउने क्रम जारी छ । जिल्लाका विभिन्न सङ्घसंस्थाले हालसम्म रु ४६ लाख सहयोग गरेका छन् । सोही क्रममा प्रभावित परिवारको राहत, उद्धार तथा पुनःस्थापनाका लागि राप्ती स्वास्थ्य विज्ञान प्रतिठान घोराहीले रु १५ लाख ६० हजार ५५५ रकम प्रधानमन्त्री दैवी प्रकोप उद्धार कोषमा जम्मा गरेको छ । प्रतिष्ठानका सूचना अधिकारी निशान भट्टराईका अनुसार उक्त रकम त्यहाँ कार्यरत चिकित्सक, नर्स तथा कर्मचारीसहित ५४० जनाबाट सङ्कलन गरिएको हो । प्रतिष्ठानमा कार्यरत कर्मचारीले दुई दिन बराबरको तलब कोषमा जम्मा गरेका हुन् । त्यसैगरी तुलसीपुरमा रहेको ज्ञान ज्योति फाउन्डेसनले कोषमा रु १५ लाख १५ हजार ५५५ आर्थिक सहयोग गरेको छ । फाउन्डेसन अन्तर्गत दाङमा सञ्चालित विभिन्न विद्यालयमा कार्यरत शिक्षक, कर्मचारी र संस्थाकातर्फबाट सङ्कलित उक्त रकम कोषमा जम्मा गरिएको फाउन्डेसनका प्रमुख कार्यकारी अधिकृत (सीइओ) सुरेन्द्र जिसीले जानकारी दिनुभयो । त्यस्तै गोरखा समूह दाङद्वारा सञ्चालित विद्यालय, कलेज, अस्पताल तथा त्यहाँ कार्यरत शिक्षक, कर्मचारीद्वारा बाढीपीडितलाई रु १० लाख एक हजार सहयोग प्रदान गरिएको छ । विपद्को घडीमा थोरै भए पनि राहत होस् भन्ने उद्देश्यले गोरखा समूहअन्तर्गतका आठ विद्यालय र एउटा अस्पतालबाट उक्त सहयोग कोषमा जम्मा गरिएको गोरखा मावि घोराहीका प्रिन्सिपल मानसिंह जीएमले जानकारी दिनुभयो । त्यसैगरी त्रिशिद्देश्वरी राप्ती यातायात सेवा प्रालि तुलसीपुरले रु तीन लाख ५५ हजार ५५५ सहयोग रकम सङ्कलन गरेको प्रालिका अध्यक्ष सुरेश हमालले बताउनुभयो । त्यसैगरी तुलसीपुर उद्योग वाणिज्य सङ्घले कोषमा रु एक लाख ११ हजार १११ सहयोग गरेको सङ्घका उपाध्यक्ष देवबहादुर केसीले जानकारी दिनुभयो । रोटरी क्लब अफ तुलसीपुर सिटीले कोषमा रु एक लाख ११ हजार १११ सहयोग रकम जम्मा गरेको क्लबका अध्यक्ष देवेन्द्र केसीले जानकारी दिनुभयो । –––
प्रतिक्रिया