पार्वती पाण्डे
कपिलवस्तु, भदौ ६
जिल्ला प्रहरी कार्यालय कपिलवस्तुले साउन महिनाभर सम्पादन गरेका सुरक्षा, अपराध अनुसन्धान तथा समुदायमुखी गतिविधिको विवरण सार्वजनिक गर्दै अपराध नियन्त्रण, राजस्व संकलन तथा कानुन कार्यान्वयनमा उल्लेखनीय प्रगति भएको जनाएको छ।
मासिक पत्रकार भेटघाट कार्यक्रममा सार्वजनिक गरिएको विवरणअनुसार साउन महिनामा जिल्लाभर विभिन्न प्रकृतिका ३६४ घटना दर्ता भएका छन्। तीमध्ये ७१ वटा सवारी दुर्घटना, ३५ वटा आत्महत्या, २६ वटा उद्योगसम्बन्धी घटना, १५ वटा अवैध सामान बरामद, १० वटा कुटपिट तथा १७ वटा लागूऔषधसम्बन्धी घटना रहेका छन्।
प्रहरीका अनुसार साउन महिनामा ७१ वटा मुद्दा दर्ता भएका छन् भने विभिन्न घटनामा संलग्न ४४ जना पक्राउ परेका छन्। जिल्लामा सामाजिक समस्या, सडक सुरक्षा तथा आपराधिक गतिविधि नियन्त्रण अझै चुनौतीपूर्ण रहे पनि प्रहरीको निगरानी र कारबाही प्रभावकारी बन्दै गएको प्रहरीको दाबी छ।
अवैध सामान नियन्त्रणबाट ४३ लाखभन्दा बढी राजस्व
प्रहरीले साउन महिनामा अवैध सामान नियन्त्रणका क्रममा उल्लेखनीय राजस्वसमेत संकलन गरेको जनाएको छ। विद्युतीय सामग्री, किराना सामान, लत्ताकपडा, काठ, खसीबोका लगायतका सामग्री बरामद गरी ४३ लाख १९ हजार ४१२ रुपैयाँ बराबरको राजस्व संकलन गरिएको जिल्ला प्रहरी कार्यालयले जनाएको छ।
यसले सीमा क्षेत्रमा हुने अवैध ओसारपसार तथा चोरी–पैठारी नियन्त्रणलाई प्रहरीले प्राथमिकतामा राखेको देखाउँछ। राजस्व चुहावट नियन्त्रणसँगै अवैध कारोबार रोक्न प्रहरीको निगरानी थप प्रभावकारी बनाउनुपर्ने आवश्यकता भने तथ्याङ्कले देखाएको छ।
लागूऔषध नियन्त्रणमा कारबाही
लागूऔषध नियन्त्रणतर्फ प्रहरीले साउन महिनामा १ ग्राम ६३० मिलिग्राम ब्राउन सुगर बरामद गरेको छ। यससम्बन्धी ३ वटा मुद्दा दर्ता गरी ६ जनालाई पक्राउ गरिएको प्रहरीको विवरणमा उल्लेख छ।
लागूऔषधको कारोबार तथा प्रयोग नियन्त्रणका लागि अनुसन्धानसँगै विद्यालय, समुदाय र स्थानीय तहसँगको सहकार्यलाई थप प्रभावकारी बनाउनुपर्नेमा प्रहरीको जोड छ।
सवारी दुर्घटना न्यूनीकरण अझै चुनौती
सडक सुरक्षा प्रहरीका लागि प्रमुख चुनौतीका रूपमा देखिएको छ। साउन महिनामा जिल्लामा ७१ वटा सवारी दुर्घटना हुँदा ९ जनाको मृत्यु र ३४ जना घाइते भएका छन्। दुर्घटनामा ११४ वटा सवारीसाधन संलग्न रहेको प्रहरीले जनाएको छ।
ट्राफिक नियम उल्लंघन गर्ने सवारीचालकमाथि कारबाहीबाट १८ लाख ८४ हजार ५०० रुपैयाँ राजस्व संकलन गरिएको छ। त्यस्तै, मादक पदार्थ सेवन गरी सवारी चलाउने १०२ जनामाथि कारबाही गरिएको प्रहरीले जनाएको छ।
दुर्घटना न्यूनीकरणका लागि प्रहरीले ट्राफिक सचेतना, नियमित जाँच तथा छाडा चौपाया व्यवस्थापनलगायतका अभियान सञ्चालन गरेको जनाएको छ। तर दुर्घटनामा भएको मानवीय क्षतिको तथ्याङ्कले सडक सुरक्षा र चालक अनुशासनमा थप कडाइ आवश्यक रहेको देखाएको छ।
सफल अपरेसनलाई उपलब्धिका रूपमा प्रस्तुत
प्रहरीले साउन महिनामा भएका विभिन्न सफल अपरेसनलाई समेत प्रमुख उपलब्धिका रूपमा सार्वजनिक गरेको छ। अवैध काठ बरामद, सडक दुर्घटना न्यूनीकरणका लागि छाडा चौपाया व्यवस्थापन, ठगीमा संलग्न व्यक्ति पक्राउ, अवैध रूपमा ढुंगा–गिट्टी–बालुवा ओसारपसार गर्ने टिपरमाथि कारबाही, पेस्तोलसहित तीन जना पक्राउ तथा सामुदायिक वनबाट ६ नाल भरुवा बन्दुक बरामद गरिएका घटनालाई प्रहरीले उल्लेखनीय उपलब्धिका रूपमा प्रस्तुत गरेको छ।
समुदायसँगको सहकार्यमा जोड
जिल्ला प्रहरीले समुदाय–प्रहरी साझेदारी कार्यक्रम, विद्यालय सम्पर्क, ग्रामीण गस्ती, सार्वजनिक सुनुवाइ तथा श्रव्यदृश्य माध्यमबाट जनचेतनामूलक कार्यक्रम सञ्चालन गरेको जनाएको छ। साउन महिनाभर २४ घण्टा ग्रामीण तथा सवारी गस्तीलाई निरन्तरता दिँदै विभिन्न क्षेत्रमा सुरक्षा उपस्थिति बढाइएको प्रहरीको भनाइ छ।
प्रहरीले अपराध नियन्त्रण र कानुन कार्यान्वयनसँगै नागरिकमा सुरक्षा अनुभूति बढाउन समुदायसँगको सहकार्यलाई प्राथमिकता दिएको जनाएको छ। स्थानीय तह, सञ्चारमाध्यम, नागरिक समाज तथा अन्य सरोकारवाला निकायसँगको समन्वयलाई आगामी दिनमा अझ प्रभावकारी बनाउने प्रतिबद्धता पनि प्रहरीले जनाएको छ।
जिल्ला प्रहरी कार्यालय कपिलवस्तुका प्रहरी उपरीक्षक मनोहर प्रसाद भट्टले शान्ति सुरक्षा कायम गर्न नागरिक, स्थानीय तह, सञ्चारमाध्यम तथा सरोकारवाला निकायसँगको सहकार्यलाई थप प्रभावकारी बनाइने बताउनुभयो। अपराध नियन्त्रणसँगै समुदायको विश्वास जित्ने अभियानलाई निरन्तरता दिँदै कानुन कार्यान्वयनलाई थप सुदृढ बनाउने उहाँको भनाइ छ।
प्रतिक्रिया